Ысык-Көлдөгү таштандылар тынчсыздандырат

3 — август күнү Түп районундагы 5 айылдык китепканачылар тобу даярдаган китепканачылардын «Ысык-Көл — Ч. Айтматов — Экология» аттуу облустук семинары болуп өттү.

Семинардын катышуучулары

Семинар «Ысык—Көл кечээ, бүгүн жана эртең» аттуу көлдүн тарыхын, өсүп — өнүгүүсүн жана бүгүнкү күндүн эң көйгөйлүү маселеси болгон таштандылар жана андан арылуу ыкмаларын көрсөтүү слайды менен башталды. Экология темасында окуучу кыз «Оозеки китеби» менен тааныштырды.

Оозеки китепти презентациялоо учуру

Ысык—Көл айыл аймагында орун алган 5 айылдын китепканачылары Ч. Айтматовдун «Бугу эне» жомогун тартуулап, тарых, экология жана адамзатка тиешелүү маселелерди чагылдырышты.

Китепканачылар Бугу эне жомогун аткарышууда

Сары- Булуң айылынын китепканачысы Света Тууганбаева, Михайловка айылынын китепканачысы Анара Сарыбаева өзүлөрүнүн китептеринен Ысык-Көл, жаратылыш, канаттуулар жана экологияга байланышкан ырларынан окушса, калган үч китепканачы жогорудагы темага арналган ырларды музыканын коштоосу менен аткарышты.

Түп райондук борбордук китепкананын директору Фатима Матаева семинардын темасына шайкеш келген «Желим баштыктардын ордуна кагаз баштыктарын пайдалануу» темасын көтөрүп, желим баштыктын зыяндуулугуна токтолуп, китепканачылар окурмандарына кагаз баштыкты пайдаланууга үндөөгө чакырды.

Түп райондук борбордук китепкананын директору Фатима Матаева

Ысык-көл айыл өкмөтүнүн жетектөөчү адиси Замира Табалдиева семинардын көтөргөн темасынын маанилүүгүнө баа берип, эс алуучулардын көлгө кылган жырткычтык мамилесине таарынып, «Кудайдын күнүндө, дем алыш күндөрү да көл жээгин тазалайбыз. Желим баштык, бөтөлкөлөрдү кой, эс алуучулар таштап кеткен ич кийимдерин да тазалоого туура келет,»- дегени залда отургандарды аргасыздан күлүүгө алып барды.

Семинарга катышкан облустук Т. Сыдыкбеков атындагы китепкананын усулчулары Ысык-Көл айыл аймагынын китепканачылары көтөргөн маселени аймакта жайылтууну пландап кетишти.

Айназик Кубатбекова.