Кыргызстанда жогорку окуу жайларга кабыл алуунун биринчи туру жыйынтыкталды. Учурда анын жыйынтыгы менен ЖОЖго кабыл алынган абитуриенттердин окууну каалоосу тастыкталууда. kyrgyzmedia.kg 1-турдан кийин деле абитуриенттерди ойлондурган суроолорду анализ кылып, жооптору менен тизмектеп чыкты.
Кыргызстандын ЖОЖдоруна сынак кандай мөөнөттө өткөрүлөт?
-Тандоо жана ЖОЖдорго кабыл алуунун үч түрүн өткөрүү каралган:
1-тур – 12-14 июль аралыгында кабыл алуу болуп бүттү. 17-июль саат 17:00 чейин – кабыл алууга сунушталган абитуриенттердин ЖОЖдо окууну каалоосун тастыктоосу;
2-тур – 19-21 июлда саат 14:00 чейин – сынакка катышуу үчүн өтүнмөлөрдү берүү; 22-24 июлда саат 17:00 чейин – кабыл алууга сунушталган абитуриенттердин ЖОЖдо окууну каалоосун тастыктоосу;
3-тур – 26-28 июлда саат 14:00 чейин — сынакка катышуу үчүн өтүнмөлөрдү берүү; 29-31 июлда саат 17:00 чейин – кабыл алууга сунушталган абитуриенттердин ЖОЖдо окууну каалоосун тастыктоосу.
ЖОЖдорго гранттык окууга жана күндүзгү контракттык окууга сынактарды өткөрүүнүн мөөнөттөрү бирдей. Ал эми сырттан, кечки окууга карата сынакты өткөрүүнүн мөөнөттөрү ЖОЖ тарабынан өз алдынча белгиленет.
Абитуриенттерди кабыл алуу 30-августка чейин жүргүзүлөт.
Ар бир турда канча ЖОЖду жана адистикти тандоого болот?
Сынактын ар бир турунда абитуриент гранттык же контракттык негизде окууга сынакка катышуу үчүн бирден гана өтүнмө бере алат. Өтүнмөлөрдү бир ЖОЖго же эки башка ЖОЖго тапшырууга болот.
Башка өлкөнүн жараны гранттык негизде окууга тапшыруу үчүн сынакка катыша алабы?
Гранттык негизде окууга сынакка Казакстан, Россия, Беларусь жана Тажикстандын жарандары ЖРТга катышкан жана босогодон жогору балл алган шартта катышууга укуктуу.
ЖРТнын сертификаты канча жыл жарактуу?
ЖРТнын сертификаты учурдагы жылга гана жарактуу. Бирок, бул норма мөөнөттүү аскер кызматын өтөгөн абитуриенттерге тийиштүү эмес. Алардын ЖРТ сертификаты 3 жыл бою жарактуу, башкача айтканда, быйылкы жылы абитуриенттердин аталган категориясы сынакка катышуу үчүн 2019, 2020-жылдын сертификатын колдоно алат.
Кайсы ЖОЖдорго ЖРТнын жыйынтыгы милдеттүү эмес?
Кыргыз улуттук консерваториясынын, Улуттук көркөм-сүрөт академиясынын, Кыргыз мамлекеттик маданият жана искусство университетинин жана Кыргыз мамлекеттик дене тарбия жана спорт академиясынынын адистиктерине кабыл алууда ЖРТнын жыйынтыгы милдеттүү эмес. Сынак ЖОЖдордун өздөрүнүн кирүүчү сынактарынын жыйынтыктары боюнча өткөрүлөт.
Мындан тышкары, “Көркөм билим берүү”, “Көркөм сүрөт искусствосу” жана “Дене тарбия” багыттарына тапшыруу үчүн ЖРТнын жыйынтыктары милдеттүү эмес.
ЖОЖдо окууну каалоону тастыктоо үчүн кандай документтерди берүү керек?
Тастыктоо үчүн Сиз АМСке (автоматташтырылган маалыматтык системага) электрондук түрдө төмөндөгү документтерди тиркешиңиз керек:
• паспорт же туулгандыгы тууралуу күбөлүк;
• орто жалпы билими жөнүндө аттестат же орто кесиптик билими жөнүндө диплом;
• ЖРТнын сертификатынын алдыңкы бети.
ЖОЖдун кабыл алуу комиссиясына документтердин түп нускасын качан берүү керек?
Документтердин түп нускасын ЖОЖго кабыл алынган абитуриент окуу жылдын башында бериши керек.
Кошумча сынактарды талап кылган адистиктерге сынак кандай өткөрүлөт?
ИИМ Академиясынын, КР Куралдуу күчтөрүнүн Аскер институтунун адистиктерине кирүү үчүн сынакка катышууга ЖРТдан да, аталган ЖОЖдордун кошумча сынактарынан да ийгиликтүү өткөн абитуриенттерге мүмкүнчүлүк берилет.
Кошумча чыгармачылык сынактарды өткөрүүнү талап кылган башка адистиктерге карата сынактарга (Архитектура, Шаар куруу, Архитектуралык чөйрөнүн дизайны, Костюмдун жана текстилдин искусствосу) ЖРТдан да, ошондой эле аталган ЖОЖдордун кошумча чыгармачылык сынактарынан да ийгиликтүү өткөн абитуриенттер катыша алышат. АМС аркылуу багыттарга катталуу бул, сөзсүз аткарылуучу процедура.
Загрузка ...