Дарыгер: Кышка карата иммунитетти көтөрүү керек

Чүй облусунун Сокулук районундагы Жаңы-Жер айылында жайгашкан №43 кесиптик лицейде  өлкөнүн жети облусунан келип окуган окуучулар бар. Алардын дээрлик көпчүлүгү жатакана менен камсыз болушкан. Ата-энесинен алыстап, кесип үйрөнүүгө келген окуучулардын ден-соолугуна жоопкерчиликтүү №43 кесиптик лицейдин дарыгери Айчүрөк Байбосунова күн кечке алардын жанында. 

№43 кесиптик лицейдин дарыгери Айчүрөк Байбосунова көп жылдан бери эмгектенет.  Жатаканада ден-соолугунан мүмкүнчүлүгү чектелген окуучуларды күнү түнү көзөмөлдөө түйшүгү дагы ага жүктөлгөн. Ал учурда жатаканада  жашаган окуучулардын ден-соолугун чыңдоо, кышка карата сасык тумоодон сактануу, иммунитетти көтөрүү боюнча иш аракеттерин жүргүзүүдө.

№43 кесиптик лицейдин медайымы Айчүрөк Байбосунова

Айчүрөк Байбосунова адамдын иммунитетинин төмөндөп кетишинен улам ар түрдүү оорулардын келип чыгышы мүмкүн экендигин айтат. Ал үчүн окуучулардын тамак ашына иммунитетти көтөрүүчү азыктарды кошуу керек.

Иммундук система денени вирустар, токсиндер жана бактериялар сыяктуу козгогучтардан дайыма коргогон клеткалардын, процесстердин жана химиялык заттардын комплексинен турат. Инфекциянын жана оорунун алдын алуу үчүн күчтүү иммунитет керек. Иммунитет аш болумдуу тамактарды жеп, жетиштүү уктап, көнүгүү менен бекемделет.

Айчүрөк Байбосунова адамдын организмин оорулардан коргогон, иммундук системаны бекемдеген тамак-аштардын жана витаминдердин тизмесин сунуштайт:

• Сарымсак. Табигый антибиотик болуп эсептелинет. Күнүнө бир тишчеден сарымсак жесе, ар кандай вирустар сизге жолобойт. Эгерде жыты жакпаса, майдалап алып суу менен кошо жутса болот.Туздалган капуста. Аскорбин кычкылынын эң жеткиликтүү жана кымбат эмес булагы. Пияз, көк чөптөрдү, семичке майы менен кошуп жесе, витаминдердин бүтүндөй топтомун жеген болот.
• Уй эти. Белоктун, темирдин, цинктин жана селендин мыкты булагы. Бул элементтер организмдин ар кандай оорулар менен күрөшүүсүнө жардам берет. Сарымсак жана чийки жашылчалар менен кошуп жесе, анын натыйжасын андан бетер күчөтөт.
• Пайдалуу чайлар. Малина, карагат, лимон, бал, имбирь кошулган чайлар илгертен келаткан иммунитетти көтөрүүчү каражат болуп саналат.
• Табигый бал. Күн сайын эртең менен таза балдан бир чай кашыктан жеп алуу иммунитетти жакшы көтөрөт. Же болбосо аны чай, лимон менен айкалыштырууга болот. Эске алуучу жагдай, балды ысык сууга кошкондо анын пайдалуу касиети жок болуп кетет.
• Жемиштер. Ар кандай вирустар менен натыйжалуу күрөшүүдө адистер жашылча-жемиштерди көбүрөөк пайдаланууну сунушташат. Бул жерде эң жакшысы – цитрус жемиштери. Мисалы, бир даана апельсинде С витамининин бир суткалык нормасы камтылган. Помидор, анар, грейпфрут булар да иммунитет үчүн абдан пайдалуу.
• Суу. Иммунитеттин эң жөнөкөй, арзан “дарысы” – кадимки таза суу. Суу организмдеги ар кандай уулуу заттарды айдап чыгат,  организмге суу жетишпеген учурда сасык тумоо менен ооруп калуу коркунучу жогору болот.

«Азыр биздин жатаканада жашаган окуучулардын арасында ооругандар орточо көрсөткүчтү берүүдө. Дене табын текшерип, айылдык ооруканага алып барып дарыгердин көрсөтмөсү менен дарылап турамын. Күндүн суукташы менен сасык тумоолор күч алышы мүмкүн. Буга алдын ала иш аракеттерди көрүүдөбүз»,- дейт Айчүрөк Байбосунова.

Турсун Омуралиева