Сүлүктүдө «Китеп майрамы» болду

23-апрель Бүткүл дүйнөлүк китеп күнүнө карата Сүлүктүдөгү Исхак Раззаков атындагы №7-орто мектепте шаардык деңгээлдеги «Китеп майрамы» белгиленди. Аземге Сүлүктүдөгү окуу жайлардын китепканачылары менен кошо китеп сүйүүчүлөр катышып, №7-мектептин чыгаан окуучулары тарабынан Чыңгыз Айтматовдун чыгармаларынан сахналаштырылган көрүнүштөргө күбө болушту. Аталган мектептин директору Бактыгүл Сабурова:

«Билим дүйнөсүндөгү ийгиликке жетүүнүн ачкычы-китеп деген ураан менен иш алып барабыз. Биздин мектепте окуучулардын адабий китептерди окугандыгы боюнча атайын журналдар түзүлгөн. Учурда окуучуларыбыздын көпчүлүгүн китептин кереметтүү дүйнөсүнө тарта алдык,»- деп маек берди. Иш чаранын уюштуруучусу, И. Раззаков атындагы №7-орто мектебинин китепканачысы Саоват Маатмуратова:

«Сүлүктү боюнча жаш китеп сүйүүчүлөрдүн саны күндөн-күнгө артып жатканы, жаштарыбыздан келечекте көптү үмүттөндүрөт,»- деп оюн билдирди.   Иш чаранын соңунда эң мыкты окурмандарга кызыктыруучу белектер тапшырылды.  Кабарчы:  Айзада Эркинова