Төлөк айылында кой-эчкилерди жугуштуу оорулардан алдын алуу боюнча киринтүү иштери жүргүзүлүүдө

Төлөк айылында мал чарбачылыгы менен алектенген жергиликтүү тургундар үчүн кой-эчкилердин саламаттыгын сактоого багытталган алдын алуу иш-чаралары уюштурулууда.

Сары-Булак айыл аймагынын айыл өкмөтүнө караштуу Төлөк айылында малдын ден соолугун сактоо жана ар кандай жугуштуу оорулардын алдын алуу багытында практикалык иштер жүргүзүлүп жатат. Айылдагы жергиликтүү тургундардын кой-эчкилери атайын уюштурулган ветеринардык иш-чаранын алкагында купкалоо, башкача айтканда, малды атайын эритмеге киринтүү жолу менен иштетилүүдө. Бул ыкма малдын сырткы мителеринен арылтууга жана айрым жугуштуу оорулардын жайылышын алдын алууга багытталган маанилүү ветеринардык чаралардын бири болуп саналат.

Иш-чараны жеке ветеринардык кызмат көрсөтүүчүлөр айыл башчысы менен биргеликте уюштуруп, мал ээлерине керектүү ветеринардык талаптар жана малды иштетүүдө сакталуучу эрежелер боюнча түшүндүрүү иштерин жүргүзүп жатышат.

Малдарды өз убагында ветеринардык кароодон өткөрүп, алдын алуу иштерин жүргүзүү — малдын арасында оорулардын таралышын чектөөгө, малдын продуктуулугун сактоого жана үй-бүлөлөрдүн мал чарбачылыгынан алган кирешесин коргоого өбөлгө түзөт.

Айрыкча кой-эчкилер көп багылган айыл жерлеринде мындай профилактикалык иштерди үзгүлтүксүз жүргүзүп туруу маанилүү. Анткени малдын ден соолугуна байланыштуу көйгөйлөрдү оорунун күчөп кетишин күтпөстөн, алдын ала чара көрүү аркылуу азайтууга болот.

Төлөк айылындагы жүргүзүлүп жаткан иштер жергиликтүү тургундардын мал чарбачылыгын колдоого, малдын ветеринардык абалын жакшыртууга жана айылдагы малдардын арасында ар кандай оорулардын жайылышына жол бербөөгө багытталган.

Ветеринардык адистер мал ээлерин малды өз убагында текшерүүдөн өткөрүүгө, белгиленген ветеринардык иш-чараларга жоопкерчилик менен катышууга жана малда оорунун белгилери байкалган учурда дароо адистерге кайрылууга чакырат.

Мындай алдын алуу иш-чаралары айылдагы мал чарбачылыгынын туруктуу өнүгүшүнө шарт түзүп, жергиликтүү тургундардын малын сактоого жана ветеринардык коопсуздукту камсыз кылууга жардам берет.

Бурул Майрамбек кызы