Терек-Сууда айылдык кеңештин ачык сессиясында үч маселе каралды

Кетмен-Дөбө айылдык кеңешинин ачык сессиясы 2015-жылдын 14-апрелинде болуп өттү. Анда үч маселе боюнча талкуу болду.

Биринчи маселеде малчылардын көчүп конуусу жана мал багуу акысы каралды.

Э. Мырзырайымов, А. Сыргабаев ж.б малчылар «элдин мал багуу акысын күздө беришерин, өлгөн, жоголгон малдардын ордун  төлөп беришерин айтып, мал багуу акысы жандык малга 50 сом, бодо малга 350 сом туура деп ойлорун айтышты. Ошондой эле 15-апрелде көчүп кетип,  күзүндө 1-октябрда кыштоого алыскы жайыттардан көчүп келүү туура болорун билдиришти.

Бирок мал багуунун акысы боюнча ар кандай талаш тартыштар болду. Айыл өкмөт башчысы Советбек Дженалиев мал багуу акысы мыйзамдын негизинде, малчы менен мал кошкон адамдын ортосунда келишимдин негизинде болорун айтты.

Талаш тартыштын жыйынтыгы менен  малчылардын көчүп кетүүсү 15-апрелге, ал эми көчүп келүүсү Терек-Суу айылы боюнча 5-октябрга, Чоң-Арык боюнча 15-октябрга белгиленип, токтом кабыл алынды.

Экинчи маселе боюнча жергиликтүү бюджеттин долбоору 2.5млн сомго бекитилди.

Үчүнчү маселеге жайыт коюлуп, жарыш сөзгө чыккан мал багуучулар: «Терек участкасына Токтогул завхозунун бир коро малы жайылып жаткандыгын, малды биздин учетубузда турган Жоробековдор багарын жана жайыт акысын төлөбөгөндүгүн, малдары жайытты жаз-күз жеп кетип жаткандарын айтып,  жайыт комитетинин көзөмөлгө алышсын» деп суранышты.

Жайыт комитетинин сунушу менен жайыт акысын мал башына чогултуп берүү жагы малчыларга милдеттендирилди.

Жайкы мал санакты саноого айылдык кеңештин депутаттарынан кошулуп комиссия түзүлдү. Мындан башка маселелердин чечилиши боюнча толук маалыматты айыл өкмөттүн жооптуу катчысынан алсаңыздар болот.

Даярдаган: Нурбек Мырсырайымов