Токтогул: Коргол Досу уулунун музейинин айланасы тосулду

Токтогул районуна караштуу Чоң-Арык айылында жайгашкан Коргол Досу уулунун адабий-мемориалдык музейинин айланасы толук тосулду.

Маданий очоктун инфраструктурасын жакшыртууга багытталган бул долбоор Токтогул райондук өнүктүрүү фонду тарабынан каржыланды. Музейдин айланасын иретке келтирүү жана коргоо иштерине жалпысынан 774 768 сом жумшалды.

Коргол Досу уулу (1882–1962) — кыргыз эл оозеки чыгармачылыгында өчпөс из калтырган залкар төкмө акын, атактуу комузчу жана манасчы. Ал улуу ойчул, демократ акын Токтогул Сатылгановдун эң ишенимдүү, жакын шакирттеринин бири болгон. Коргол акын устатынын «Кедейкан», «Курманбек», «Жаныш-Байыш» сыяктуу улуу дастандарын, обон-күүлөрүн кийинки муундарга жеткирүүдө негизги көпүрө болгон өнөрпоз. Ошондой эле, ал залкар комузчу Ниязалы Борошевден да таалим алып, күүчүлүк өнөрдү бийик деңгээлге көтөргөн.

Музей 1994-жылы залкар акындын 110 жылдык мааракесине карата Чоң-Арык айылында расмий ачылган. Бүгүнкү күндө музейде акындын өздүк буюмдары, уникалдуу кол жазмалары, тарыхый сүрөттөрү жана китептери камтылган 320дан ашык баалуу экспонат сакталып турат.
Музей райондогу Т. Сатылганов жана Ж. Бөкөнбаев атындагы музейлер менен биргеликте бирдиктүү маданий тармакты түзөт. Бул жерде заманбап «Музей түндөрү» жана башка маданий-агартуу иш-чаралары байма-бай өткөрүлүп келет.

Музейдин айланасынын тосулушу — бул жөн гана курулуш эмес, бул улуттук казынаны, тарыхты жана маданий мурастарды сактоого болгон олуттуу кам көрүү. Токтогул райондук өнүктүрүү фонду тарабынан бөлүнгөн каражат тарыхый эстеликтин коопсуздугун камсыздап, анын туристтик жагымдуулугун арттырууга өбөлгө түзөт. Музей кийинки муундар үчүн кыргыздын төкмөлүк жана күүчүлүк өнөрүн тааныткан башкы маданий борбор катары кызмат кыла бермекчи.

Даярдаган: Азема Сабырбекова