Депутат Болотбек Борбиев айыл өкмөт башчылары жана министрлик өкүлдөрү менен жыйын өткөрдү

Жогорку Кеңештин депутаты Болотбек Борбиев Токтогул районунун Э.Иманалиев, Үч-Терек, А.Суеркулов жана Кетмен-Дөбө айыл өкмөттөрүнүн башчылары менен жумушчу жолугушуу өткөрдү.

​Иш-чаранын негизги максаты — Токтогул районунда курч бойдон калып жаткан калкты таза суу менен камсыздоо маселесин талкуулоо жана аны чечүүнүн натыйжалуу, ыкчам жолдорун издөө болду.

​
Жумушчу жолугушууга тиешелүү тармактын жетекчилери катышты:
​Суу ресурстары, айыл чарба жана кайра иштетүү өнөр жайы министрлигине караштуу Ичүүчү суу менен камсыздоону жана саркынды сууларды чыгарууну өнүктүрүү департаментинин жетекчиси Зарылбек Каратаев;
​Коомчулукту өнүктүрүү жана инвестициялоо агенттигинин (АРИС) аткаруучу директору Калыбек Жумадылов баш болгон тармактык өкүлдөр.

​
Жолугушуунун жүрүшүндө аймактагы таза суу долбоорлорунун ишке ашырылышы каралды. Ошондой эле бул багытта келип чыккан негизги тоскоолдуктар жана аларды тез арада жоюу чаралары ортого салынды.
​
Жыйындын жыйынтыгында депутат Болотбек Борбиев тиешелүү мамлекеттик органдарга жана мекемелерге Токтогул районунун калкын таза суу менен кыска мөөнөттө толук камсыз кылуу милдетин тапшырды.

Даярдаган: Азема Сабырбекова