Кант шаарынын тургундары мэрге көйгөйлөрүн түз эфирде айтышты

Nevaket Media уюштурган түз эфирде Кант шаарынын тургундары мэр Улан Майлибашевге шаардагы инфраструктуралык көйгөйлөр боюнча суроолорун түз берүүгө мүмкүнчүлүк алышты. Алар тротуарлардын жоктугун, канализация тармагын кеңейтүүнү, №3 маршрутту Октябрь көчөсүнө кайтарууну жана короолордогу кооптуу дарактарды бутоо маселелерин көтөрүштү.

• 2-кичи райондогу кооптуу дарак текшерилет

  2-кичи райондогу №5 үйдүн тургундары үйдүн жанындагы чоң дарактын ири бутактары кооптуу абал жаратып жатканын айтышты.

  Тургундардын айтымында, катуу шамал болгондо дарактын бутактары үйдүн чатырына жана терезелерине урунат. Буга чейин бир бутак жолго кулап, дагы бири автоунаага зыян келтирген. Тургундар даракты толугу менен кыйып салууну эмес, кооптуу чоң бутактарын гана бутоону суранышууда.

  Мэр учурда 2-кичи райондо дарактарды бутоо жана куураган бутактарды тазалоо иштери атайын техниканын жардамы менен жүргүзүлүп жатканын билдирди.

  «Эфирден кийин дароо биздин кызматкерлерге тапшырма берем. Алар барып, бул даракты текшеришет. Эгер чындап эле мындай көйгөй бар болсо, аны чечүүгө мүмкүнчүлүк бар», — деди Улан Майлибашев.

  Nevaket Media №5 үйдүн жанындагы дарактын кооптуу бутактары буталарына көз салып турат.

  Киргшелкте тротуар азырынча курулбайт

  Түз эфирде Киргшелктеги тротуар маселеси да көтөрүлдү. Тургундар тротуар жок болгондуктан, жөө адамдар унаа жүрүүчү жол менен басууга аргасыз болуп жатканын белгилешти.

  Мэрдин айтымында, учурда Киргшелкте 13 чакырым суу түтүгүн тартуу иштери аяктап жатат. Баасы болжол менен 15 млн сомду түзгөн түтүктөрдү жана керектүү жабдууларды «Ас-Сафа» фонду берген.

  Суу түтүктөрү тартылып, жер казуу иштери бүткөндөн кийин топурак табигый түрдө чөгүп, ныкталышы үчүн убакыт талап кылынат. Ошондуктан азырынча жолдорду асфальттоо жана тротуар куруу пландалган эмес.

  Ошол эле учурда жолдорду калыбына келтирүү боюнча тендер өткөрүлгөн. Жыл аягына чейин көчөлөргө шагыл төгүп, атайын техника менен тегиздеп, ныктоо пландалууда.

  Мындан тышкары, Киргшелкте тургундарды ичүүчү суу менен камсыз кылуу үчүн 190 метр тереңдиктеги скважина тазаланган.

  Түз эфир учурунда мэр тротуарлардын качан курулары боюнча так мөөнөт айткан жок.

  Канттын бардык аймактарына канализация качан тартылат?

Тургундар борборлоштурулган канализация тармагы жок аймактарга канализация качан тартыларын да сурашты.

Улан Майлибашевдин айтымында, учурдагы саркынды сууларды тазалоочу курулмалар суткасына болжол менен 4,5 миң куб метр сууну тазалоого эсептелген. Бирок иш жүзүндө келип түшкөн саркынды суунун көлөмү мындан кыйла көп.

Тазалоочу курулмаларды кеңейтүү үчүн кошумча 1,5 гектар жер бөлүнгөн. Алардын кубаттуулугун суткасына дагы 14 миң куб метрге көбөйтүү пландалууда. Мэрдин айтымында, долбоор ишке ашса, тазалоочу курулмалардын кубаттуулугу Кант шаарын толугу менен жана Люксембург айылын тейлөөгө жетет.

Долбоорду каржылоо үчүн Европа реконструкциялоо жана өнүктүрүү банкына (ЕБРР) өтүнмө берилген. Учурда ал тиешелүү органдар менен макулдашуу баскычында турат.

Каржылоо жактырылса, мэрия кийинки жылы долбоордун экинчи этабын баштоону көздөөдө. Анын алкагында тазалоочу курулмаларды кеңейтүү жана магистралдык канализация түтүктөрүн тартуу каралган.

Бирок иштердин качан башталары каржылоонун бөлүнүшүнө байланыштуу болгондуктан, азырынча так мөөнөт айтыла элек.

• №3 маршрут Октябрь көчөсүнө кайтарылабы?

Түз эфирде тургундар №3 маршрутту Октябрь көчөсүнө кайтаруу маселесин да көтөрүштү.

Мэрдин айтымында, шаар бийлиги №3 маршрутту Октябрь көчөсү аркылуу жүргүзүү сунушу менен Транспорт министрлигине буга чейин кайрылган, бирок өтүнүч канааттандырылган эмес.

Атайын комиссия сунушталган аялдама жайларын текшерип, алардын белгиленген талаптарга, анын ичинде аялдамалардын жайгашуусу жана ортосундагы аралык боюнча талаптарга жооп бербей турганын билдирген.

Ошого карабастан, мэрия бул багыттагы ишти улантып, маселени кайра кароо өтүнүчү менен жогорку органдарга дагы бир жолу кайрылууну көздөп жатат.

«Чындыгында, ар бир көчөдө коомдук транспорт болушу керек», — деп белгиледи мэр.

Демек, №3 маршрутту Октябрь көчөсүнө кайтаруу маселеси азырынча чечиле элек. Маршрут качан каттай баштай турганы боюнча так мөөнөт жок.

Nevaket Media тургундар көтөргөн маселелерге көз салууну улантат

Түз эфирде көтөрүлгөн суроолордун басымдуу бөлүгү Кант шаарынын күнүмдүк инфраструктурасына — жолдорго, тротуарларга, канализацияга, коомдук транспортко жана короолордогу коопсуздукка байланыштуу болду.

Айрым маселелер боюнча мэрия конкреттүү чараларды көрүүнү убада кылды. Ал эми башка иштердин аткарылышы каржылоого, тиешелүү органдар менен макулдашууга жана техникалык талаптарга байланыштуу.

Nevaket Media түз эфирде айтылган убадалардын жана берилген тапшырмалардын аткарылышына көз салып, жыйынтыгы тууралуу тургундарга маалымат берип турат.

Даярдаган: Венера Шонкоева