Канттагы жагымсыз жыттын булагы азырынча аныктала элек

Кант шаарында мезгил-мезгили менен пайда болгон жагымсыз жыт жана түтүн тургундарды тынчсыздандырууда. Nevaket Media уюштурган түз эфирде шаар тургундары мэр Улан Майлибашевден абанын сапаты текшерилип жатабы жана жагымсыз жыттын булагы аныкталдыбы деп сурашты. Буга чейин да тургундар пластмасса же боёктун жытына окшош кескин жыт сезилип жатканын билдиришкен. Айрымдары анын булагы өнөр жай ишканалары болушу мүмкүн деген божомолдорун айтышкан.

Канттагы жагымсыз жыт кайдан чыгууда?

Гагарин айылындагы таштанды полигону

Мэрдин айтымында, жай мезгилинде күйүктүн жытынын себептеринин бири таштанды полигонундагы өрт болгон. Андан чыккан түтүн айрым учурларда Кантка чейин жеткен.

Бирок акыркы убакта тургундар даттанып жаткан өзгөчө жыттын булагы азырынча так аныктала электигин Улан Майлибашев билдирди.

Мэр мүмкүн болгон себептердин бири катары Канттын айланасындагы айыл чарба жерлерин атады. Ал жерлерде ар кандай жер семирткичтер колдонулат. Ошол эле учурда ал бул мүмкүн болгон себептердин бири гана экенин белгиледи.

«Муну менен кантип күрөшүүнү деле билбей жатам. Экология кызматына оозеки кайрылдым. Алар да карашты, бирок азырынча булагын аныктай элек», — деди мэр.

Анын айтымында, түз эфир болгон күнү өзү да жагымсыз өзгөчө жытты сезип, анын кайдан чыгып жатканын аныктоого аракет кылган.

Тургундар жытты өнөр жай объектилери менен байланыштырышууда

Түз эфир учурунда Nevaket Media шаар тургундарынын комментарийлерин да мэрге жеткирди. Айрым тургундар пластмасса менен боёктун жытына окшош жыт жана түтүн Покровка менен Киргшелк тараптан келип жатканын жазышкан. Алар анын булагы бул аймактардагы ишканалар же цехтер болушу мүмкүн деген божомолдорун билдиришкен.

Киргшелкте жакында иштей баштаган алюминийди кайра иштетүүчү ишкана тууралуу да өзүнчө суроо берилди.

Мэрдин айтымында, ал тургундар жана комиссия мүчөлөрү менен бирге бул ишканага өзү барып текшерген. Текшерүү учурунда ал жерде өзгөчө жыт байкалган эмес.

Ошондой эле мэр темир жол өтмөгүнүн аркы тарабындагы аймактан түтүн чыгып жатканы тартылган видео тууралуу айтып берди. Анын айтымында, ал объект мэриянын карамагындагы аймакка кирбейт. Түтүндүн жана жыттын булагы так аныкталган эмес.

Канттагы өнөр жай ишканалары тууралуу эмне айтылды?

Улан Майлибашев Канттын аймагында иштеп жаткан өнөр жай ишканалары экологиялык талаптарды сактап, тиешелүү чыпкалоо системаларын колдонорун билдирди.

Түз эфирде цемент заводунан чыккан түтүн боюнча тургундардын даттануулары да айтылды. Мэрдин маалыматына караганда, ишкана экологиялык кызматтар тарабынан текшерилип турат.

Ошол эле учурда Nevaket Media конкреттүү ишканаларда экологиялык талаптар бузулбаганы тууралуу маалымат түз эфирде мэр тарабынан айтылганын белгилейт. Эфир учурунда лабораториялык изилдөөлөрдүн жыйынтыктары же экологиялык көзөмөл органдарынын расмий корутундулары көрсөтүлгөн жок.

Абанын сапаты текшерилип турабы?

Nevaket Media Кантта абанын сапатына аспаптык өлчөөлөр жүргүзүлөбү жана экологиялык көзөмөлдүн тиешелүү корутундулары барбы деген суроо берди.

Мэрдин айтымында, Жаратылыш ресурстары министрлигинин алдында атайын кызматтар иштейт жана аларда абанын сапатын текшерүүгө керектүү жабдуулар бар.

Анын маалыматына ылайык, адистер жерине барып текшерүү жүргүзүп турушат жана алынган көрсөткүчтөр жол берилген чектен ашкан эмес.

Бирок түз эфир учурунда акыркы текшерүүлөрдүн так жыйынтыктары, алардын качан жүргүзүлгөнү жана абадагы булгоочу заттардын көрсөткүчтөрү айтылган жок.

3-кичи райондун тургундары түтүнгө даттанышууда

3-кичи райондун жанында жашаган тургундардын бири эртең менен бул аймакты түтүн каптап, «дем алуу кыйын болуп жатканын» билдирди.

Мэр жыл бою туруктуу түрдө катуу түтүн болуп турат деген пикирге кошулган жок. Анын айтымында, абал көзөмөлдөнүп, таштанды полигонунда атайын техника иштеп жатат.

Ошондой эле ал түз эфир болгон күнү Кантты катуу түтүн каптады деген билдирүүлөрдү көргөнүн, бирок ошол учурда, анын баамында, бүт шаарга тарай тургандай көлөмдөгү түтүн болбогонун айтты.

Мэр тургундарды жергиликтүү түтүндүн булагын мүмкүн болушунча тактоого чакырды. Анткени айрым учурларда түтүн жеке үйлөрдөгү меш же мончо жагуудан, таштанды өрттөөдөн же чакан от жагуудан да чыгышы мүмкүн.

Жагымсыз жыттын булагы азырынча аныктала элек

Ошентип, түз эфир учурунда Кантта мезгил-мезгили менен пайда болгон өзгөчө жагымсыз жыттын так булагы эмне экени тууралуу бир жактуу жооп берилген жок.

Мүмкүн болгон себептер катары таштанды полигонундагы өрт, айыл чарба жерлерине жер семирткичтерди колдонуу, жергиликтүү түтүн булактары жана башка факторлор айтылды. Ошол эле учурда тургундар өнөр жай объектилеринин абанын сапатына тийгизген таасири боюнча тынчсыздануусун билдирүүнү улантууда.

Кырдаалга объективдүү баа берүү үчүн абанын сапатын аспаптар менен өлчөөнүн жыйынтыктары жана тиешелүү экологиялык кызматтардын расмий корутундулары маанилүү.

Nevaket Media Канттагы абанын сапатына байланыштуу кырдаалга мындан ары да көз салып, тиешелүү органдар текшерүүлөрдүн жана өлчөөлөрдүн жыйынтыктарын берген учурда аларды жарыялап турат.

Даярдаган: Венера Шонкоева