«Медиа сабаттуулук, тынчтык жана биримдик үчүн» чакан гранттарынын жеңүүчүлөрү долбоорлорун тааныштырышты

Бишкек, 2025-жылдын 14-октябры. Жамаатык ЖМКлар Бирлиги Кыргыз Республикасынын Маданият, маалымат жана жаштар саясаты министрлиги менен биргеликте «Медиа сабаттуулук, тынчтык жана биримдик» чакан гранттарынын жеңүүчүлөрүнүн долбоорлорун тааныштыруу иш-чарасын өткөрдү. Иш-чара ЮНЕСКОнун 2025-жылдагы Глобалдык медиа жана маалыматтык сабаттуулук жумалыгынын алкагында Бишкектеги Orion мейманканасында өттү.

Жеңүүчүлөр медиа жана маалыматтык сабаттуулукту чыңдоого, сынчыл ой жүгүртүүнү өнүктүрүүгө, жалган маалыматка жана санариптик алдамчылыкка  каршы күрөшүүгө багытталган демилгелерди тааныштырышты. Долбоорлор коомдун маалыматтык коркунучтарга туруктуулугун жогорулатууга жана жамааттардын биримдигин бекемдөөгө салым кошту.

Катышуучулар медиа сабаттуулугунун тынчтык куруудагы ролун, дезинформацияга жергиликтүү демилгелер аркылуу каршы туруу жолдорун, ошондой эле маалымат мейкиндигин көзөмөлдөө үчүн mediamap.kg интерактивдүү картасын колдонууну талкуулашты.

Форум медиа сабаттуулукту жайылтуунун жана коомдогу ишенимди чыңдоонун инновациялык ыкмаларын көрсөттү. Ал мамлекеттик органдардын, жарандык коомдун жана медианын өкүлдөрүн тажрыйба алмашуу жана Кыргызстанда туруктуу маалымат мейкиндигин түзүүгө багытталган демилгелерди колдоо үчүн бириктирди.

Сарногоева Салкын, КР Маданият, маалымат жана жаштар саясаты министрлигинин Маалымат саясаты башкармалыгынын башчысы: «Кичи гранттардын финалисттеринин долбоорлорун тааныштыруу – жергиликтүү демилгелер медиа сабаттуулукту жана коомдун биримдигин чыңдоого кандай салым кошо аларын көрүү үчүн уникалдуу мүмкүнчүлүк. Биз мындай маанилүү долбоорлорду колдогонубуз менен сыймыктанабыз».

Сарногоева Салкын, КР Маданият, маалымат жана жаштар саясаты министрлигинин Маалымат саясаты башкармалыгынын башчысы

Аида Бекташева, ЮНЕСКОнун улуттук офицери: «Колдоо тапкан долбоорлор ар кандай форматтарды жана каналдарды – мамлекеттик телеканалдардан жергиликтүү көз карандысыз медиага чейин көрсөтөт. Ар бир долбоор өзүнүн уникалдуу аудиториясы менен күчтүү, алар аркылуу медиа жана маалыматтык сабаттуулук боюнча маанилүү мазмун таратылат. Аялдар, жаштар, майыптыгы бар адамдар сыяктуу аярлуу топтордун үнүнө өзгөчө көңүл бурулат. Биз адамдарга маалыматты сынчыл талдоо куралдарын берген демилгелерди колдогонубузга кубанычтабыз».

Аида Бекташева, ЮНЕСКОнун улуттук офицери

Иш-чара «Тынчтык куруу жана жарандык коомду тартуу боюнча улуттук потенциалды чыңдоо» долбоорунун алкагында өттү, ал ЮНЕСКО жана БУУӨП тарабынан БУУнун Тынчтык куруу фондунун колдоосу менен ишке ашырылды.