Искра: 25 жыл күттүргөн мектеп

Искра айылы Баткен облусуна караштуу Лейлек районунун Сумбула айыл өкмөтүнө карайт. Учурда бул айылдын окуучулары, мугалимдери жалпы жашоочуларынын кубанычтары койнуна батпай турган учуру. Себеби, курулушу 25 жылдан бери бүтпөгөн мектептин имараты пайдаланууга берилет.

Искра айылындагы жаңы мектептин курулуш иши совет учурунда 1989-жылдары башталган. Совет доору кулагандан кийин бул ишти эч ким колго албай толугу менен токтоп калган. Жаңы мектептен үмүтүн үзгөн окуучулар эски имарат таптакыр жараксыз болгон учурда, окуу процесси токтоп калбаш үчүн айыл өкмөтүнүн кеңсесинде жана айылдык бейтапканада окуган учурлары дагы болгон. Ушундай кыйынчылыктарды баштан кечирген мектеп администрациясы мамлекетке кайрылып, анын натыйжасында 2004-жылы мектептин биринчи блогу бүткөрүлүп, окуучулар окуп баштады. Андан кийин 2010-жылы экинчи блогунун курулушу бүтүп пайдаланууга берилет. Бирок, мектептин имараты толугу менен бүтпөй калган. Бул боюнча мектеп директору Марипов Тажимурат төмөнкүлөрдү айтып кетти: “Мамлекет тарабынан 32 млн сом бөлүнүп, мектеп имаратынын курулушу кайра жанданып, Ош шаарындагы ОсОО “АРТ Курулуш” компаниясы тендерден утуп, мектептин курулушун колго алды. Мектептин административдик  жана калган бөлүктөрү, спорттук залы бүткөрүлүп, бүгүнкү күндө мектеп толугу менен, толук шарты менен бүтүп, ачылуу аземинин астында турат. 25 жыл бою бүтпөй келген бул мектеп бүгүнкү күндо 620 орунга ылайыкташып, колдонулууга берилет. Бул мектептин бүткөрүлүшүнө Жогорку Кеңештин депутаты Арипов Назарали Турдалиевичтин, Лейлек райондук администрация башчысы аким Арипов Тилеберди Турдалиевичтин, Сумбула айыл өкмөт башчысы Бекмуратов Баймурат Асатовичтин, ошондой эле айыл аксакалдары Канатов Толөгөн, Эрматов Мустафа, Разаков Эргештин кошкон салымдары зор”, деди мектептин директору Марипов Тажимурат.Мектептин ичинде заманбап типтеги спорттук зал, компьютердик каана уюшулуп, мугалимдер жана окуучулар үчүн мыкты эмеректер, интерактивдүү доска алынып келинди. Белгилей кетсек, буга чейин окуучулар кыйын шарттарда суукта ылай кечип дене-тарбия сабагын өтүшсө, эми тилеген тилектерине жетип олтурушат. Бул жагымдуу окуя бир гана окуучулар үчүн эмес, мугалимдеп үчүн дагы кубанычтуу болду. Манас атындагы орто мектебинин мугалими Канатова Гулмахрам өз сезимдери менен бөлүшө кетти: “Бүгүнкү күнү биз, Манас атындагы орто мектебинин мугалимдери жана окуучулары, жаны мектептин ачылышына аябай кубанып жаткан учурубуз.  Анткени бул мектеп 20 жылдан ашуун убакыт бою коркунучтуу, бузулган абалда болуп келген. Сабактар ар кайсы мекемелерди имаратында өтүлүп, бир топ кыйынчылыктарды туудурган. Мисалы, кааналар тар болгондуктан окуучулар парталарга үчтөн отурууга мажбур болушкан, андан тышкары сабак учурунда бир каанадагы үндөр экинчи каанага  кеңири угулуп тоскоолдуктар болуп турган”, деп билдирди мугалими эжеке Канатова Гулмахрам.Мектептин директору Марипов Тажимураттын айтымында, мектептин расмий ачылышы октябрь айынын башында болот. Ачылуу аземине Кыргыз Республикасынын президенти Атамбаев Алмазбектин келиши дагы күтүлүүдө. Эл оозунда “Падыша келген жерге кут конот” деп айтылгандай, айыл эли мамлекет башчыбыздын келишин жакшылыкка жоромолдоодо.Даярдаган: Ырысбүбү Жалилова