Тогуз-Торо райондук ӨКМи кургак чөп жана тоюттарды сактоодо өрт коопсуздугун сактоого чакырат

Кургак чөп, саман жана башка тоюттар тез тутануучу материалдар болуп саналат. Айрыкча талааларда, жайыттарда, короо-жайларга жакын жерлерде жана тоют сакталган жайларда өрт коопсуздугуна өзгөчө көңүл буруу зарыл.

Өрттүн алдын алуу үчүн төмөнкү эрежелерди сактоо сунушталат:

• Кургак чөп, саман жана тоюттарды ачык оттон алыс сактаңыздар.
• Тоюттарды электр зымдарына, трансформаторлорго жана башка электр жабдууларына жакын жайгаштырбаңыздар.
• Чөп жана саман сакталган жерлерге жакын жерде тамеки тартпаңыздар жана от жакпаңыздар.
• Талаада, короо-жайда жана ачык аймактарда таштанды же кургак чөп өрттөбөңүздөр.
• От жаккан учурда аны кароосуз калтырбай, толук өчкөнүнө ынаныңыздар.
• Ширеңке жана башка от булактарын балдардын колу жетпеген жерде сактаңыздар.
• Унааларды кургак чөп баскан жерлерге токтотпоого аракет кылыңыздар.
• Тоюттарды турак үйлөрдөн жана башка өрт коркунучу бар объектилерден коопсуз аралыкта сактаңыздар.

Өрт чыккан учурда:

• Өрттүн белгилери байкалса, дароо коопсуз жерге чыгып, 101 же 112 номерине кабарлаңыздар.
• Маалымат бергенде өрт чыккан жердин так дарегин, эмне күйүп жатканын жана өрттүн болжолдуу көлөмүн мүмкүн болушунча так айтыңыздар.
• Өрттү өз алдынча өчүрүүгө аракет кылып, өзүңүздүн өмүрүңүздү жана ден соолугуңузду тобокелге салбаңыздар.

Урматтуу жарандар!
Өрттүн алдын алуу — ар бирибиздин милдетибиз. Бир эле этиятсыздык чоң өрт кырсыгына, мал-жандыктардын кырылышына, турак жайлардын жана башка мүлктүн зыянга учурашына алып келиши мүмкүн.
Кайдыгер болбоңуздар! Өрттүн алдын алуу — ар бирибизден башталат.
Даярдаган: Анара Мааметова