Токтогул районунда таза суу көйгөйү боюнча иштер уланууда

Жалал-Абад облусунун Токтогул районунда жалпы 45 айыл болсо, анын 13 айылында таза суу менен камсыздоо маселеси чечиле элек. Бул тууралуу Токтогул районунун акими Акылбек Тюкебаев билдирди.

Маалымдалгандай, Сары-Камыш айыл өкмөтүндөгү Бирлик айылында, Э. Иманалиев айыл өкмөтүнө караштуу Аң-Арык, Бел-Кара-Суу, Бууракан, Камыш-Башы, Коңур-Өгүз, Көк-Кашат, Ортожон, Чеч-Дөбө, Шайык, Ак-Жар айылдарында, Токтогул шаарынын Кара-Суу айылында жана Кетмен-Дөбө айыл өкмөтүндөгү Кушчу-Суу айылында таза суу жок.

“Долбоорлор менен иштер аткарылып, 2005-2007-жылдары АРИСтин каржылоосу жана элдин салымы менен Чолпон-Ата айыл аймагынын Ак-Тектир, Абды Суйеркулов айыл аймагынын Кара-Жыгач жана Үч-Терек айыл аймагынын Жетиген айылдарынын таза суу түтүктөрү реаблитацияланып, бүгүнкү күндө иштеп жатат. Үч-Терек айыл аймагынын Үч-Терек, Саргата, Кызыл-Ураан айылдары 2019-жылы таза суу долбооруна Ислам өнүктүрүү банкынын каржылоосу менен кирип, 2024-жылы курулушу бүткөрүлдү», — дейт Тюкебаев.

Ал эми Токтогул шаарынын биринчи траншы бүткөрүлүп, жалпы сметалык баасы 5,2 млн евронун 3 млн евролук иштери аткарылгандыгын маалым болду.
“Башкы суу коргону 100 пайыз бүтүп, жумушчу комиссия болгон. Экинчи траншы 2025-жыл ичинде башталат. 2025-жылга сунушталган айылдар Кара-Күңгөй, Мазар-Суу, Кушчу-Суу, Кара-Суу, Арал, Толук, Терек-Суу, Чоң-Арык жана Торкен”, — деди ал.
Ошондой эле Кызыл-Өзгөрүш айылынын Өзгөрүш, Көк-Кашат, Камыш-Башы аталган 3 айылы экспертизадан өткөрүлүп, даярдалып бирок финансы каражатынын тартыштыгынан курулушу башталбай токтоп тургандыгын район башчысы кошумчалады.