Токтогулдун даамы – таза балык

Токтогул аймагы өзүнүн даамдуу балыктары жана табигый таза балы менен кеңири белгилүү. Токтогул суу сактагычынын суулары балык өстүрүүгө жана алардын түрдүү түрлөрүнүн көбөйүшүнө эң ыңгайлуу шарттарды түзөт. Учурда суу сактагычта бир нече баалуу балык түрлөрү кездешет.

Форель (Калкан балык): Таза, муздак жана агын сууларды жактырган бул балык өзгөчө даамы жана назик эти менен бааланат.

Сазан: Жергиликтүү суулардын эң кеңири тараган жана салмактуу келген түрлөрүнүн бири.

Ак амур: Суу чөптөрү менен азыктанып, сууну тазалоодо да чоң ролду ойногон даамдуу балык.

Дөң маңдай (Толстолобик): Чоң өлчөмдөгү, майлуулугу орточо келген пайдалуу балык.

Карас (карась) — карп сымалдар тукумуна кирген, тузсуз суу балыгы.
Балыктын дарылык жана пайдалуу касиеттери төмөнкүлөр:

1. Көздүн көрүүсүн жакшыртат
Балыктын курамында көздүн саламаттыгы үчүн баа жеткис болгон Омега-3 май кислоталары жана А витамини өтө көп. Бул элементтер көздүн торчо кабыгын азыктандырып, кургак көз синдромунун алдын алат жана картайганда көрүү жөндөмдүн начарлашынан сактайт.

2. Мээнин ишин активдештирет
Омега-3 май кислоталары борбордук нерв системасына түздөн-түз таасир этип, эс тутумду күчөтөт, көңүл бурууну жакшыртат жана акыл эмгеги менен иштегендерге чоң кубат берет.

3. Жүрөк-кан тамыр системасын коргойт
Балык этиндеги пайдалуу майлар кан басымын жөнгө салып, кан тамырларда холестериндин топтолушуна жол бербейт. Бул инфаркт жана инсульт коркунучун кыйла азайтат.

4. Сөөк жана муундарды бекемдейт
Балыктын курамындагы D витамини организмге кальцийди толук сиңирүүгө жардам берип, сөөктөрдүн жана тиштин бекем болушун камсыздайт.

5. Жаштыкты узартат (Антиоксиданттык таасир)
Жаш кары дебей, балыкты туура даярдап жеген адамдардын териси серпилгич келип, организм эрте картайыштан сакталат. Анткени анын курамында жогорку сапаттагы жеңил сиңүүчү протеиндер бар.

Даярдаган: Азема Сабырбекова