У.Самудиновдун жаркын элесине арналган турнир өттү

19- мартта Кочкор районундагы Кара- Суу айылында жайгашкан «Ж.Саралаев» атындагы спорт комплексинде Урусланбек Самудиновдун жаркын элесине арналган волейбол боюнча турнир болуп өттү. Турнирге 35 жаштан 50 жашка чейинки жарандар катышып, жалпысынан 15 команда ат салышты. Турнирди У.Самудиновдун достору уюштурду.

Урусланбек Самудинов 1984-жылы Кочкор районундагы Кара-Суу айылында мугалимдин үй-бүлөсүндө жарык дүйнөгө келген. Мектепти аяктагандан кийин Бишкек шаарында электрик кесибин аркалап келген. Жубайы Рейна экөө төрт баланы тарбиялап өстүрүшкөн. Ата-энесине, бир туугандарына өзгөчө күйүмдүү, боорукер болгон. Алардын жеңилин жерден, оорун колдон алган уул жана бир тууган эле. Ал эми досторунан эч нерсесин аябаган, дайыма жардамга колун сунуп, акыркы нанын берүүгө да даяр эле деп эскеришет достору. Ал 2021-жылы күтүүсүз кырсыктан каза болгон.

Азамат Айдарбек уулу-уюштуруу тобунун мүчөсү

Азамат Айдарбек уулу: «Урусланбек биздин эң жакшы досубуз эле. Бүгүн биз анын жаркын элесине арнап турнир уюштуруп жатабыз. Былтыр футбол оюнун өткөргөнбүз. Досубузду эскерүү менен бирге айылыбыздын тургундарын сергек жашоого үндөп жатабыз. Албетте жеңүүчүлөргө баалуу сыйлыктарыбыз бар. Учурдан пайдаланып демөөрчүлөргө ыраазычылык билдирип кетем».

1-орундун ээлери