Вилли Брандт тууралуу китеп кыргыз тилине которулду

Эмгек «Роза Отунбаеванын демилгеси» фондунун «Өрнөктүү өмүрлөр» сериясынын алкагында жарык көргөн. Максаты дүйнөгө белгилүү инсандардын эмгектерин, алардын  ишмердүүлүгүн кыргыз коомчулугуна тааныштыруу менен бирге  коомдук-саясий өңүттө кыргыз тилинин калыптануусуна өбөлгө түзүү.

“Роза Отунбаеванын демилгеси” фонду буга чейин да өрнөктүү өмүрлөр сериясынын алкагында бир топ китептерди кыргыз тилинде басып чыгарган. Алар Мао Маонун “Менин атам Ден Сяопин”, Масару Ибуканын “Үч жаштан кийин кеч”, М. Гандинин “Өмүр таржымалым же чындыкка умтулуу жаатындагы тажрыйбаларым тууралуу баян», У. Черчиллдин “Асти сынбагыла”, Ж. Кеннединин “Каармандык өрнөктөрү”, Аль Мактумдун “Ой учкундары”, Си Цзинпиндин “Мамлекетти башкаруу жөнүндө” аталышындагы китептер.

“Кезектеги дүйнөлүк лидерлердин өлкөнү өнүктүрүүдөгү салымын тааныштыруу боюнча кыргыз тилиндеги китеп жарык көрүп турат. Китептин өзгөчөлүгү ушуга чейин батыш жана биздин өлкө ортосундагы көз караштарды айнекти жууп салгандай таптакыр башка деңгээлде көрөсүздөр. Сөзсүз окуп көрүүнү сунуштайм”, -деп билдирди “Роза Отунбаеванын демилгеси” эл аралык фондунун аткаруучу директору Догдуркүл Кендирбаева.

Китепти кыргыз тилине коомдук ишмер Эмилбек Каптагаев которгон. Кыргыз коомчулугуна дүйнөлүк саясий окуяларды тааныштыруу менен кыргыз тилин саясий багытта калыптандырууга салым кошуу:

“Аталышы айтып тургандай бул түрмөктүн максаты дүйнөгө белгилүү инсандардын эмгектерин, алардын карманган идеяларын жана ишмердүүлүгүн кыргыз коомчулугуна тааныштыруу, дүйнөлүк саясий адабияттын кыргыз тилинде жеткилең болуусуна аракет кылуу, коомдук-саясий өңүттө кыргыз тилинин калыптануусуна өбөлгө түзүү.”
“Вилли Брандт. Тандалма сөздөр жана макалалар” китеби кыргыз тилинде саясий адабиятты жайылтуу, социалисттик интернационалдын мурунку Президенти, эл аралык жумушчу кыймылынын көрүнүктүү ишмери, дүйнөлүк Нобель сыйлыгынын лауреаты В. Брандттын тандалма сөздөрү жана макалаларын жайылтуу максатында жарык көрдү. Вилли Брандт өрнөктүү өмүр сүргөн. Анын ой-толгоолору жана ынанымы ушунчалык терең-алар толугу менен гумандуулуктун жана тынчтыктын идеяларына негизделген, ички дүйнөсүнүн чордонун эркиндик, акыйкаттык жана кызматташтык баалуулуктары түзгөн, ал аз өмүрүн мына ушул баалуулуктарды турмуш чындыгына айлантууга арнаган. Вилли Брадттын эмгектери кыргыз тилине алгачкы жолу которулуп жарыкка чыгып жатат.
Китеп Германиянын Фридрих Эберт атындагы фондунун көмөгү жана “Роза Отунбаеванын демилгеси” эл аралык коомдук фонду тарабынан Кыргыз Республикасынын Германия менен кызматташтыгынын 30 жылдыгына карата жана “Өмүрү өрнөк инсандар” түрмөгүнүн алкагында басылды.
Китеп саясат таануучуларга, тарыхчыларга, жогорку окуу жайлардын докторанттарына, магистранттарына жана студенттерине, ошондой эле жалпы окурмандарга арналат.

Китептин бет ачары 21-сентябрда Улуттук Тарых музейинин конференц-залында болуп өттү. Иш-чарага , КР өкмөтүнүн жана мамлекеттик, эл аралык уюмдардын, элчиликтердин өкүлдөрү, Жогорку кеңештин депутаттары, академиялык уюмдардын, өнүгүү институттарынын, өкмөттүк эмес уюмдардын, жогорку окуу жайлардын өкүлдөрү катышышты.

Айгерим Кубатбекова