Бүгүнкү экономикалык коомдо айымдар карьерага курууга дагы, үй оокаттарын кылууга да жетишүүгө аракет кылат. Бирок, ар дайым экөө тең идеалдуу ишке аша бербейт. Кантип, эки камчыны бирдей кармаса болот?
1. Бир учурда бир канча ишке кантип жетишсе болот? Бул мени бактылуу кылабы?
Бойдок кыздар да турмуш курган соң, карьера менен үй-бүлөлүк иштерди бирге алып кете албай калуудан коркушат. Көпчүлүгү бардык жерде убагында болууга аракет кылышат. Үй оокаттарынын дайым чаң жукпай таза болуусу, бала багуу, ага мээрим төгүү жана ийгиликтүү карьера курууну көпчүлүк аялзаты кыялданат.
Мындан улам, алар өздөрүнө оор жүктү артып алышат. Аялдын бүтпөгөн түйшүгү – аны акырындык менен чарчатып, энергиясын гана жоготпостон, ден-соолугун да алат. “Баардыгына жетишишим керек” — деген принцип биринчи кезекте нервге таасир берет. Эгер, бир жумушу учурунда бүтпөсө, бук болуу, кыжыр келүү пайда болот. Жубайлар ортосундагы мамилеге да терс таасир бериши толук ыктымал.
Андыктан, алгач жоопкерчиликтер менен түйшүктөр үй-бүлө мүчөлөрүнө тең бөлүштүрүлүшү керек. Бирок, көпчүлүк түгөйлөр же уул-кыздар бөлүнүп жаткан ишти аткаргысы келбеши толук мүмкүн. Алгач үй-бүлө мүчөлөрүнө абалды түшүндүрүп, кеңешип милдеттерди так бөлүштүрүү аркылуу гармонияга жетишүүгө болот.
Мындай кадам, ар бир адамды үйгө жакын кылып, салым кошуп жатканын сездирип турат. Андан тышкары, ашыкча иш кылып жаткан адамдын күч-кубатын үнөмдөйт. Элестетиңиз, бардык ишти өзүнө жүк кылып үйүп алган айым кантип бактылуу болот? Ал тескерисинче терс энергия чачып, маанайы сус, жакындарына нааразы болуп, бара-бара урушчаак болуп калат.
2. Кайсы ишти кылуу керек экендигин кантип чечүү керек?
Белгиленген убакыттын ичинде приоритеттерди чечүү маанилүү. Ал эми ресурастарды учурдагы маанилүү нерсеге багыттоо керек. Бирок, сиз узак мөөнөттүү максаттарды да эске алышыңыз абзел. Эгер, мисалы, сиздин жумушта кирешелүү жана маанилүү бир долбоор болсо, анда анын мөөнөтүн чечип, өзүңүзгө иштөөгө көбүрөөк убакыт бөлүүгө мүмкүнчүлүк бериңиз. Өзүңүздү өзүңүз ашыкча сындап, балдарыма жана үй-бүлөмө керектүү кам көрө албай жатам деген ойлор адамды негативдүү ойлорго камап, алсыратат.
3. Карьера үчүн жакындарымдын колдоосуна кантип ээ боло алам?
Жолдошуңуз, балдарыңыз жана туугандарыңыздан маанилүү долбоор же жумуштагы кайсы бир иштерди бүткөрүү үчүн сизге убакыт керек экендигин билдирип, түшүндүрүңүз. Аларды адаттагыдай эле жакшы көрөөрүңүздү айтып, ал эми түзүлгөн шартка ылайык ийгиликтүү иштөө максатыңызды билдириңиз. Бул сүйлөшүүдө убактыңыздын дээрлик канча бөлүгү жумушка коротууларын да ачык айтыңыз. Мындан тышкары, үй иштеринде, бала кароодо жолдошуңуз жана эң жакын адамдарыңыздын жардамына муктаж экениңизди билдириңиз.
4. Жумушта көп убакыт кармалам. Үй-бүлөмө кантип убакыт бөлө алам?
Мындай учурда, сиз үй-бүлөңүздү сыйлай турганыңызды билдирип турсаңыз – ортодогу жакындык, мамиледе жылуулукту камсыздайт. Кандай гана иш кылбаңыз, үй-бүлөңүз менен байланышта болуңуз: телефон менен сүйлөшүп, жетишкендиктериңиз жөнүндө айтып берип, алар жөнүндө да сураңыз. Видео менен байланышка чыгып, балдарыңыздын маанайына, алардын эмне менен алек болуп жатканына кызыгыңыз.
Ошондой эле, кээ бир адамдар жумуш чөйрөсүндөгү чыр-чатактарды жана көйгөйлөрдү үйгө, ал эми үй-бүлөлүк чыр-чатактарды жумушка алып келишет. Бул сиздин жашооңузда орун албашы керек болгон дагы бир маанилүү фактор. Көпчүлүк адамдар ( аял же эркек дебестен) муну эске алышпайт. Бирок жумушта үй-бүлөлүк көйгөйлөр жөнүндө ойлонбоого аракет кылуу иштен алдыга жылууга жакшы натыйжа берсе, үйдө эс алууга мүмкүнчүлүк берет.
5. Үй оокаттарында жана жумушта кантип эффективдүү иш алып бара алам?
Үй иштерине жана жумушка тийиштүү убакыт бөлүңүз. Ошондой эле, иш учурунда үй-бүлөңүз майда-чүйдө иштер менен сизди алаксытпоосуна көндүрүңүз. Үй-бүлөлүк план түзүп, ким кандай иштерди аткараарын бирге кеңешип, жазып алыңыздар. Үйдөгү иштер бардык үй-бүлө мүчөлөрүнө тегиз бөлүнүшү керек. Албетте, ал наристе болсо ал мындай жоопкерчиликти аткара албайт.
Ошондой эле, жумуш процесстерин жеңилдетүү боюнча да атайын иш жүргүзүңүз. Эгер сиз жетекчилик кызматта иш алып барсаңыз, кызматкерлердин кесиптик чеберчилигин арттырууга шарт түзүңүз. Эгер сиз, кимдин бирөөнүн кол алдында кызматкер болсоңуз, ар бир күнү аткарылчу иштердин планын түзүп, натыйжаны камсыз кылууга аракеттениңиз.
6. Өзүмдү кароого, өнүктүрүүгө убакыт жетпей калат...
Өзүңуздү сүйүүгө, мактоого, кам көрүүгө убакыт табыңыз. Англис тилнде “me time” — “өзүмө убакыт” деген түшүнүк бар. Сиздин жашооңузда да ушул түшүнүк барбы? Же “башкаларга убакыт” деген принципте жашап жүрөсүзбү? Өтүп кеткен бир жумага анализ кылсаңыз, бул нерсеге оңой эле жооп табасыз.
Өзүмө бөлүнгөн убакытта эмне менен алек болсом деген суроо да жаралат. Курбуңуз менен сүйлөшүү, спорт, медитация, сулуулук салонуна баруу, сейилдөө, чыгармачылык — мунун баары сизди кубаттандырат.
Албетте, бул нерселерди жазып,элестетүү аны аткарганга караганда кыйла жеңил. Ошондуктан, жашооңузду баракта гана эмес, аракеттер менен жеңилдетүүгө ашыгыңыз.
Загрузка ...