Кызыл-Булакта кечкисин жарыктандыруу ишке кирди

Кулатов айыл аймагынын борбору Кызыл-Булактын борбордук көчөсү эми кеч киргенде жарык болуп турат. Жарыктандыруу системасы кечээ 26-сентябрда ишке киргизилди.

Ош облусунун Ноокат районуна караштуу Кулатов айыл өкмөтүнүн башчысы Нуридин Мадимаров бул айыл тургундарынын коопсуздугу үчүн орнотулган.

“Жол чырактары эми керек нерсе. Айыл тургундарынын коопсуздугу үчүн жол чырактарын ишке киргиздик. […] Жалпы баасы бир миллиондон ашык акча бөлүнгөн. Бир айдын ичинде Оштон бир фирма орнотту”, — деп билдирди Мадимаров.

Айыл өкмөт башчысы кошумчалагандай, жол боюнда орнотулган чырактар кечки саат сегизде өзү күйүп, эрте мененки алтыга чейин иштейт. Таң атаары менен өзү өчөт.

“[…] Өзүнүн счетчиги бар. Мурун ар жанып өчкөнүнө акча төлөгөн болсок, азыр счетчик көрсөткөнүн беребиз. Жалпысы бир километрден ашык аралыкка жол чырактары орнотулду”, — деди Кулатов айыл өкмөтүнүн башчысы Нуридин Мадимаров.

Кызыл-Булактын тургуну Мамасали Мурзаев жолго орнотулган жарыктандыруу башка айылдарга караганда өз айылын өзгөчөлөнткөнгө өбөлгө түздү деп эсептейт.

“Азыркы көчөнүн боюндагы жол чырактары мурун жок болчу. Бизге биринчи жолу коюлд. Башка айылдарга караганда борборубуз өзгөчөлөнүп туруш керек эле. Жол чырактары коюлганы бизге пайдасы тийип жатат. Караңгы менен жарыктын айрымасы бар да. Кечээ кечинде иштеди азыр эми биз үчүн шаарга окшоп калды”, — дейт айыл тургуну Мурзаев.

Даярдагандар: Марлен Жамалов, Айкын Дарбишов