Мал базарындагы жандуу соода: Сары-Булак айыл аймагы жарманке өткөрдү

2026-жылдын 7-мартында бекитилген графикке ылайык Кочкор районундагы мал базарында Сары-Булак айыл аймагынын айыл өкмөтү тарабынан азык-түлүк продукциясынын жарманкеси уюштурулду. Иш-чарада жергиликтүү өндүрүүчүлөр өздөрүнүн табигый жана сапаттуу азык-түлүктөрүн элге сунушташты.

Жарманке эртең менен эрте башталып, Кочкор районунун ар кайсы айылдарынан келген тургундарды бир жерге чогултту. Айрыкча мал базарынын аймагында элдин кыймылы жанданып, сатуучулар менен сатып алуучулардын ортосунда кызуу соода жүрдү. Сары-Булак айыл аймагынан келгендер өздөрүнүн өндүргөн азык-түлүк продукцияларын – эт, сүт азыктары, май, курут, сүзмө, каймак, бал, ошондой эле үй шартында даярдалган башка да улуттук тамак-аштарды алып келишкен.

Жарманкенин негизги максаты – айыл жергесинде өндүрүлгөн табигый жана экологиялык жактан таза продукцияларды түздөн-түз элге жеткирүү болуп саналат. Мындай иш-чаралар аркылуу ортомчуларсыз соода жүргүзүлүп, бир жагынан өндүрүүчүлөр өз эмгегинин үзүрүн көрүшсө, экинчи жагынан тургундар сапаттуу азык-түлүктү жеткиликтүү баада сатып алуу мүмкүнчүлүгүнө ээ болушат.

Иш-чаранын жүрүшүндө базарга келген тургундар жергиликтүү өндүрүүчүлөрдүн товарларына кызыгуу менен кайрылып, керектүү азык-түлүктөрүн сатып алышты. Айрымдары айылдан келген табигый азыктарды атайын издеп келип жатышканын айтышты. Алардын айтымында, айыл жергесинде өндүрүлгөн азыктар даамы жана сапаты жагынан өзгөчө болуп, ден соолукка пайдалуу.

Сары-Булак айыл аймагынын өкүлдөрү мындай жарманкелер айыл тургундары үчүн да, сатып алуучулар үчүн да пайдалуу экенин белгилешти. Анткени айылдагы дыйкан-фермерлер өздөрү өндүргөн продукцияларын шаар же район борборуна алып келип сатууга мүмкүнчүлүк алышат. Бул алардын кирешесин көбөйтүп, айыл чарба ишмердүүлүгүнүн өнүгүшүнө да өбөлгө түзөт.

Жарманке учурунда сатуучулар өз продукцияларын ирээттүү жайгаштырып, сатып алуучуларга кеңири маалымат берип турушту. Айрыкча сүт азыктары, курут жана каймак сыяктуу улуттук азыктарга кызыгуу жогору болду. Көпчүлүк сатып алуучулар үй шартында даярдалган таза азыктарды сатып алууга артыкчылык беришти.

Мындай азык-түлүк жарманкелери акыркы жылдары Кочкор районунда жакшы салтка айланып, жергиликтүү өндүрүүчүлөрдү колдоонун натыйжалуу жолдорунун бири болуп калды. Бул иш-чаралар аркылуу айыл чарба продукцияларын жайылтуу менен бирге айыл тургундарынын эмгегин баалоо жана жергиликтүү экономиканы колдоо мүмкүнчүлүгү жаралууда.

Бүгүнкү жарманке да элдин кызыгуусун жараткан иш-чаралардын бири болду. Мал базарына келген тургундар азык-түлүк сатып алуу менен катар айыл чарбасындагы жаңылыктар, мал чарбачылыгы жана айыл турмушу тууралуу пикир алышып, жандуу баарлашууга да мүмкүнчүлүк алышты.

Уюштуруучулардын айтымында, мындай жарманкелер мындан ары да белгиленген графиктин негизинде өткөрүлүп турат. Бул болсо айыл аймактарындагы өндүрүүчүлөргө колдоо көрсөтүү менен бирге калкты сапаттуу жана табигый азык-түлүк менен камсыз кылууга чоң салым кошот.

Даярдаган: Бурул Майрамбек кызы