Ноокатта дыйкандар алмаларын 8 сомдон 22 сомго чейин сатышууда

Быйыл Ош облусунун Ноокат районуна караштуу Т. Кулатов айыл аймагында алма түшүмү жакшы болду. Көп болгонуна байланыштуу баасы арзан болууда. Дыйкандар бааынын көтөрүлбөгөнүнө нааразы. Алманы 8-22 сомдон сатышууда. Айыл тургундары алмаларын жергиликтүү алма алуучуларга өткөрүшөт. Айрымдары терилген алмаларды сатып алышса, кээ бирлери өздөрү терип кетишет.

Т. Кулатов айыл өкмөтүнүн башчысы Батырбек Кааров алма баасын төмөн болуп жаткандыктан дыйкандар сактап туруп кийинчерээк саткан жакшы экенин айтат. Ошондой эле бул маселени чечүү үчүн логистикалык борбор уюштурууну пландап жатышканын билдирди:

«Быйыл Кулатов айыл аймагында көпчүлүк мөмө жемиштер арзан болду. Алардын ичинен эң арзаны алма. Былтыркы жылга салыштырмалуу 10 сомго чейин баасы төмөн болуп жатат. Себеби Кулатов айылында алмалар көп түшүм алып, кардарлар да аз болууда. Биз айыл тургундарына да кайрылып жатабыз. Бүгүнкү күндө баа арзан болсо сатпай турсаңар, кийинчерээк баа көтөрүлөт. Биз логистикалык борбор уюштуруу боюнча тиешелүү кагаздарды даярдап жатабыз. Кийинки жылдын планына насип кылса 1000 тонна мөмө жемиш бата турчу логистикалык борбор курабыз. Кулатов айыл тургундарынын мөмө жемиштери сакталып, баасы көтөрүлгөндө алып чыгып сатабыз.»- дейт билдирди.

Т. Кулатов айылынын тургуну Роман Маматов 5-6 жылдан бери алмаларды алып сатуу иши менен алектенип келет.

“Бул жылдын түшүмү былтыркыга караганда көбүрөөк болду. Алманын баасы 8сомдон 22 сомго чейин жетти. Алманы алып туруп Бишкекке, Ошко жана Жалал-Абадка алып барабыз. Ал жакта алманын баасы түшүп кеткендиктен, алмалар арзан баада алынууда. Ага чейин алмалар муздаткычта сакталат. Быйылкы жылдын эсебинен 200тоннадан ашык алмалар алынууда. Андан сырткары жерге түшкөн алмаларды 2,5 сомдон алып, сок чыгарчу заводдорго сатып жатабыз» — деп билдирди.

Арык-Тейит айылынын тургуну Мамадияр Токтосунов 12 жылдан бери багындагы алмаларын сатат. Алмадан тышкары жүгөрү эгет, мал чарбачылык менен алектенип келет. Анын алма багында 4 түрдүү алма сорту бар. Ал 2-3 жылдан бери алманын баасы көтөрүлбөгөнүн айтат:
“Менин багымда 4-5 түрдүү алмалар бар. Бактын негизги бөлүгү көк алма. Алмалар мол түшүм алыш үчүн жаздын алды менен караш керек, астына көң салыш керек, дары салыш керек, жакшы буташ керек ошондо жакшы түшүм берет. Алмалардын аралыгы 4 метрден. Алманын баасы быйылкы жылы 8-22 сомго чейин болду. 3-4 жылдан бери бир баада турат алманын баасы көтөрүлбөй жатат». — деп билдирди.

Даярдаган: Жумагүл Көчкөнбаева, Мухаммадамин Токтосунов