Сары-Дөбөнүн тургундары үчүн кыш мезгили кандай болду?

Ызгаардуу кыш мезгилинин бүтөрүнө саналуу гана күндөр калды. Дегеле бул кыш элет элинин эсинде эмнеси менен калды? Кар кандай түштү, деген суроолордун айланасында Лейлек районуна караштуу Сары-Дөбө айылынын тургундары менен маек куруп көрдүк.

Быйыл кыш оор болгонун билдирди Сары-Дөбө айылынын тургуну Галбай Мурадилов.

“Быйыл кыш айыл тургундары үчүн мурдагы жылга караганда оор болду. Кардын эң жогорку көрсөткүчү 30 сантиметрге жетти. Кудайга шүгүр, малдарды карап жаттык. Кыштан эсен-аман эле чыкты. Айыл тургундары кышка жакшы камынгандыктан тоют маселеси да жаралган жок, жетиштүү болду”, — деди Мурадилов.

Дагы бир айыл тургуну Анвар Рыскулов кардын көп жааганы пайдалуу экенин айтат.

“Кар жакшы эле жаады. Кардын көп жааганы эгин-талаа дыйканчылык менен күн кечирген элет эли үчүн пайдалуу десек болот. Себеби жерде нымдуулук көп болуп, эгин-талаа иштери жакшы болот”, — деп айтты Анвар Рыскулов.

Даярдаган: Динара Таштанова
Редактору: Аймир Каныбекова
Сынак үчүн