Барскоон айыл аймагында “Миң күндүк үй-бүлөнүн мыкты чарбасы” аталышындагы кароо-сынак уюштурулду. Сынак “Айыл чарба өндүрүмдүүлүгүн жана азыктандырууну жакшыртуу” долбоорунун жамааты менен биргеликте жүзөгө ашты.
Кароо-сынакка APNIP долбоорунун мүчөсү Жамиля Добаева, райондук айыл чарба департаментинин башчысы Кубатбек Ашыров, айыл өкмөттүн аппарат кызматкерлери, айыл тургундары жана мекеме, ишканалардын жетекчилери катышты.
“Миң күндүк үй-бүлөнүн мыкты чарбасы” аттуу кароо-сынакка Барскоон айыл аймагындагы 8 үй-бүлө катышып, долбоордун коюлган талаптарына жараша алган упайлардын негизинде жеңүүчүлөр аныкталды.
Аталган долбоор үй-бүлөлөрдүн туура тамактануусу, ар бир жаран өз ден-соолугуна туура кам көрүүсүн максат кылат. Сынактын жеңүүчүсү, айыл тургуну Адилет Илгедеев долбоордун жаш үй-бүлөлөр үчүн пайдасы зор экендигин билдирди.
“Мен үй-бүлөм менен бул долбоорго үч жарым ай аралыгында катышып жеңүүчү болдук. Кайсыл жашылчада витамин көп, аларды кандай сакташ керек жана кайсыл учурда жеш керек экендигин билип алдык. Биздин үй-бүлө жеңүүчү болгондугубузга байланыштуу 100 литрлик муздатчкыч берилди. Биз ага жашылчаларды тоңдуруп кыш мезгилинде тамак-ашка кошуп пайдаланалы деп жатабыз”.
Толук кандуу тамактануу жана аз кандуулукту алдын алуу, үй-бүлө мүчөлөрүнүн жоопкерчилигин көтөрүү максатында уюштурулган иш-чарага долбоор алкагында даярдалган белектер ыйгарылган.
Ошондой эле, айыл өкмөттүн бюджетинен каржылык колдоо көрсөтүлдү дейт айыл өкмөт башчысы Бакыт Асанов.
“Жергиликтүү бюджеттен жеңүүчү үй-бүлөлөргө акчалай сыйлык берүүгө беш миң сом өлчөмүндөгү акча каражаты бөлүнүп берилди. Ал эми долбоор тарабынан кызыктыруучу белектер жана “Үлгүлүү үй чарбасы” аталышындагы таблолор тапшырылды”.
Сынактын жыйынтыгы менен 1-орунду 25 балл эсебинде Барскоон айылынын тургуну Адилет Илгедеев үй-бүлөсү менен утуп алды. Ал эми 2-орунду айыл тургуну Тилек Рысмендеев үй-бүлөсү менен 22 балл эсебинде багындырып, төрт миң сомго ээ болду. А.Бапиев 20 балл менен 3-орунду багындырып, миң сом жана үй оокатына керектүү белектер берилди.
Гүлкайыр Осмоналиева