Ак-Талаа: Көпүрө жабылганы жол кире кымбаттады

Ак-Талаа районундагы төрт айылды райондун борбору менен байланыштырып турган көпүрө жабылганына бир топ убакыт болду. Бул арада айылдарда жашоочуларга түшүндүрүү иштери жүргузүлүп, медпункт жана башка зарыл кызматтар ачылды.

Бирок учурда айыл жашоочулардын негизги көйгөйү жол киренин эки эсе кымбатташы болууда. Анткени айыл жашоочулары көпүрө жабылып калгандан бери азык-түлүк, ар кандай күнүмдүк муктаждыктар үчүн 8-Март айылы аркылуу айланып райондун борборуна, же Нарынга эки эсе алыс чакырымдагы жол басып, барып келиши керек.

Ак-Кыя айылынын тургуну Салкын Сыдыкова жол кире кымбаттаганын айтат.

«Мурда биздин айылдан Баетовго чейин 200 сом болсо, азыр 400 сом болду. Ошондой эле көпүрөгө чейин айылдын унаасы менен келебиз. Анын нары жагында башка таксилерге түшүп кетебиз», — деди Сыдыкова.

Ал эми Жаны-Талап айыл өкмөтүнүн башчысы Руслан Алдееванын айтымында, айылда ФАП бар.

«Бирок кошумча медицина кызматкерлерин чакырып жатабыз. Ошондой эле тез жардам автоунаасы да берилген», — деди ал.

Аталган айылда да жол кире 100 сомго кымбаттады, мурда 150 сом болсо, азыр 250 сом менен Нарынга барып келип жатышат.

Сынак үчүн даярдаган: Кубанычбекова Эльвира