Терек-Суу айылындагы таза суу маселесин чечүү үчүн 186 миллион сом керектелет

Токтогул районуна караштуу Терек-Суу айылында таза суу көйгөйү чечилбей келет. Айыл тургундары таза суу менен камсыз болбогонуна нааразы. Кээде булганган кир сууну ичүүгө аргасыз болууда.

Терек-Суу айылынын тургуну Ташкул Сооронбеков айылдагы эң чоң көйгөй бул таза суу экенин билдирди. Жергиликтүү тургундар көчөдөгү жалпы суу колонкаларынан ташып ичишет. Айрым көчөлөрдө алар иштебегендиктен башка көчөдөн ташып ичүүгө туура келет. Кээде жамгыр жааганда ал суу дагы кирдеп, ылайга айланат:

“Биздин көчөдөгү суу колонкалары иштебейт. Суу алыш үчүн мектептин жанына барып, алып келебиз. Жамгыр жааганда, малдар тоодон келгенде күз жаз ылай, чыла суу ичебиз, бул боюнча өкмөткө акимге чогулушта кайрылганбыз. Буюрса жакын арада чечип беребиз дешти. Айыл тургундары таза сууну күтүүдө”.

Ташкул Сооронбеков

Терек-Суу айылынын тургуну Эрке Стамалиева таза суу көйгөйү боюнча төмөнкүдөй оюн билдирди:
“Терек-Суу айылынын көйгөйү таза суу. Ичүүчү суубузду кудуктан алабыз. Крандан суу чыкпай калган учурда сууну чөмүчкө чейин толтурууга аракет кылабыз. Азыркы заманда суунун маселесин чечсе болот. Айыл өкмөт, эл бирдиктүү көтөрүлсө таза суу чыгарганга мүмкүнчүлүктөр көп деп ойлойм», — деп ойлойт Эрке Стамалиева.

Эрке Стамалиева

Кетмен-Дөбө айыл аймагынын айыл башчысы Айдар Алишеров таза суунун суу түтүктөрү 1962-1965 жылдары курулуп пайдаланууга берилгенин айтат. Ошол убактан бери суу түтүктөрү алмаштырылган эмес. Бул маселени чечүү үчүн 186 миллион сом акча каражаты керек болот. Бирок бул каражатты чогултуу маселе болууда.
“Таза суу маселеси курч маселе, бизде агын суу дагы, таза суу маселеси дагы абдан курч. Таза суу тоодон чогулган булактардан, мөңгүлөрдөн чогулган суулар биздин айыл аймак кампаларына келип топтолот. Ошол жерден кампалардагы суулар суу түтүктөрү аркылуу Терек-Суу, Чоң-Арык айыл аймактары суу менен камсыз болот. Бирок, муну толук кандуу таза суу деп айта албайбыз. Анткени, бул нерсе таза суунун талабына толук жооп бербейт”.

Кетмен-Дөбө айыл аймагынын айыл башчысы Айдар Алишеров

Айыл башчынын айтымында бүгүнкү күндө Терек-Суу менен Чоң-Арык айылдарында таза суу долбоорунун сметасы даярдалып бүткөн. Жалпы долбоордун баасы 186 миллионду түзөт. 83 миллион сом бул Чоң-Арык аймагынын таза суусу ал эми 103 миллион сом Терек-Суу аймагынын таза суусу. Эгер аталган акча каражаты берилсе, Чоң-Арык жана Терек-Суу аймактарынын таза суу маселеси жоюлмак.

Кетмен-Дөбө айыл аймагы төрт айылдан жана бир канча калктуу конуштардан турат. Эң чоң айылдар Терек-Суу айылы жана Чоң-Арык айылы болуп эсептелет. Айыл аймак боюнча акыркы каттоо менен 8007 адам катталган.

Асема Таалайбекова, Дилде Таалайбекова, Эльбина Аттокурова