Видео: Уландар арасындагы дүйнө чемпионун жердештери тосуп алды

Ак-Талаа районунун Жаңы-Талап айылынан чыккан балбан Өмүрбек Асан уулун жердештери Салтанат менен тосуп алды. Балбан Өмүрбек Асан уулу Иорданиянын Амман шаарында күрөш боюнча 17 жашка чейинкилер арасындагы Дүйнө чемпионатында алтын медал тагынды.

Иордания өлкөсүнүн Амман шаарында 17 жашка чейин уландар арасында өткөн эркин күрөш боюнча дүйнө чемпионатында Өмүрбек 1/8 финалддык беттеште япониялык балбан Итсуки Йонаширону 6:4 эсебинде, чейрек финалда украиналык балбан Иван Зелискону 11:0 эсебинде утуп, жарым финалга чыккан. Ал эми жарым финалдык беттештер америкалык балбан Жордин Пол Рэйнини 12:6 эсебинде уткан.

Беттеш учурунда бутунан жаракат алган америкалык балбанды килем үстүнөн көтөрүп чыгып, атаандашына сый көрсөткөнү дүйнөлүк күрөш уюмунун баракчасына жүктөлдү. Ал эми финалдык беттеште азербайжандык балбан Хусейин Исмаиловдун үстүнөн 5:1 эсебинде жеңишке жетип, дүйнө чемпиону болууга жетишкен.

28-август күнү, балбан Өмүрбек Асан уулун Жаңы-Талап айылынын жаштары, ата-энеси, бир туугандары жана алгачкы машыктыруучусу Алмаз Кайыпов жана ишкер Марлес Апилов баш болуп «Манас» аэропортунан тосуп алышып, балбандын урматына сый дасторкон жазылып, өзүнө тебетей кийгизилип жана  iPhone 15 Pro Max үлгүсүндөгү телефон тартуулашты.

Барчын Мамытбекова